శిఖర్‌ ధావన్‌ వీరాభిమాని రామ్‌ బహదూర్‌

ప్రపంచంలో మనిషిని పోలిన మనుషులు ఏడుగురు ఉంటారని వింటూ ఉంటాం. ముఖ్యంగా సెలబ్రిటీల పోలికలతో ఉండే సామాన్యులు కూడా కాస్తో కూస్తో క్రేజ్‌ సంపాదించుకుంటున్నారు. తమకంటూ అభిమానులను సొంతం చేసుకుంటున్నారు. టీమిండియా క్రికెటర్‌ శిఖర్‌ ధావన్‌ పోలికలతో ఉన్న రామ్‌ బహదూర్‌ కూడా ఈ కోవకు చెందిన వాడే. ధావన్‌ ఫ్యాన్స్‌తో పాటు ధావన్‌ అభిమానాన్ని కూడా అతడు చూరగొన్నాడు. తన ఆరాధ్య దైవమైన ధావన్‌ ప్రత్యేక సందర్భాల్లో తనను విష్‌ చేస్తాడంటూ మురిసిపోతున్నాడు. కొడుకుకు జొరావర్‌(ధావన్‌ కొడుకు పేరు) అని పేరు పెట్టుకున్న రామ్‌ బహదూర్‌.. తొలిసారి ధావన్‌ను కలిసిన నాటి సంగతులను టైమ్స్‌ ఆఫ్‌ ఇండియాతో పంచుకున్నాడు.

ఉత్తరప్రదేశ్‌కు చెందిన రామ్‌ బహదూర్‌(27) బలియాలో జన్మించాడు. లక్నోలో కంప్యూటర్‌ ఆపరేటర్‌గా పనిచేస్తున్న అతడు.. ఓ రోజు సెలూన్‌ షాప్‌నకు వెళ్లగా బార్బర్‌ అతడికి కటింగ్‌ చేసిన అనంతరం... ‘‘భయ్యా నువ్వు అచ్చం టీమిండియా ఓపెనర్‌ శిఖర్‌ ధావన్‌లా కనిపిస్తున్నావు అన్నాడట. అనంతరం తన మీసకట్టు కూడా అతడిలా మార్చేస్తే చాలా బాగుంటుందంటూ.. శిఖర్‌ ఫొటోను రామ్‌ బహదూర్‌ ముందు ఉంచాడట. ఈ విషయం గురించి అతడు మాట్లాడుతూ.. ‘‘అతడి మాటలు నాపై ప్రభావం చూపాయి. ఇంటికి వచ్చాక అద్దంలో చూసుకున్నా. నిజమే అనిపించింది. వెంటనే శిఖర్‌ సర్‌ పోస్టర్‌ తీసుకువచ్చి గోడపై అంటించుకున్నా. నాకు నేను కొత్తగా కనిపించాను. అప్పటి నుంచి శిఖర్‌ సర్‌ అనే పిచ్చి పట్టింది’’ అని చెప్పుకొచ్చాడు.