ఆస్ట్రేలియా-టీమిండియా మధ్య వన్డే సిరీస్ వాయిదా.

 


కరోనా ప్రభావం ఆస్ట్రేలియా-టీమిండియా ఆటపై పడింది. వచ్చే ఏడాది జనవరిలో ఆస్ట్రేలియాతో భారత మహిళా జట్టు ఆడాల్సిన వన్డే సిరీస్​ను 2022కు ఆస్ట్రేలియా క్రికెట్​ బోర్డు వాయిదా వేసింది. కరోనానే ఇందుకు కారణమని వెల్లడించింది. ఆస్ట్రేలియా-టీమ్​ఇండియా మధ్య మూడు మ్యాచుల మహిళా వన్డే సిరీస్​ 2021 జనవరిలో జరగాల్సి ఉంది. అయితే 2022 మార్చిలో ప్రారంభంకానున్న మహిళా వన్డే ప్రపంచకప్​కు ముందు ఈ సిరీస్​ను నిర్వహించేలా ప్లాన్ చేసినట్లుగా క్రికెట్​ ఆస్ట్రేలియా సీఈఓ నిక్​ హాక్లే స్పష్టం చేశారు. వన్డేతో పాటు మరో మూడు టీ20లను కూడా ఈ పర్యటనలో ఉంటాయని పేర్కొన్నారు. దీనికి సంబంధించిన పూర్తి షెడ్యూల్​ను త్వరలోనే ప్రకటిస్తామని తెలిపారు. 2022 మహిళా ప్రపంచకప్​ మార్చి 4 నుంచి ఏప్రిల్​ 3 వరకు నిర్వహించనున్నారు. ఇందులో ఆడబోయే ఎనిమిది జట్లు మొత్తం 31 మ్యాచుల్లో తలపడనున్నాయి. ఈ ప్రపంచకప్​ కోసం న్యూజిలాండ్​, ఆస్ట్రేలియా, ఇంగ్లాండ్​, దక్షిణాఫ్రికా, భారత్ ఇప్పటికే​ అర్హత సాధించాయి. మిగతా మూడు జట్లు అర్హత సాధించేందుకు శ్రీలంకలో జూన్​26 నుంచి జులై 10వరకు జరగబోయే ఐసీసీ అర్హత టోర్నీలో తలపడాల్సి ఉంది.