తెలంగాణలో నిరుద్యోగులకు శుభవార్త. వివిధ శాఖలలో ఉద్యోగాలు ఖాళీ.

 


ఇక నిరుద్యోగులు మేల్కొండి.. మీకు సమయం ఆసన్నమైంది. తెలంగాణ ప్రభుత్వం త్వరలోనే ఉద్యోగాల జాతర నిర్వహించనుంది. అందుకు సంబంధించిన కసరత్తు పూర్తిచేసింది. ఇప్పటివరకు ఉద్యోగాల ఖాళీలకు సంబంధించిన వివరాలు ఇలా ఉన్నాయి. ఇప్పటికే పలు శాఖలు, సంస్థల్లో ఉద్యోగ ఖాళీల వివరాలపై స్పష్టత వచ్చింది. వివిధ శాఖల్లో సుమారు 45 వేలు, సంస్థల్లో 20 వేలు భర్తీ చేయాల్సి ఉందని ముఖ్యకార్యదర్శులు ప్రభుత్వానికి నివేదించారు.ఇందులో నాలుగో తరగతి ఉద్యోగుల వివరాలు ఉన్నట్టు తెలిపారు. ఒప్పంద, పొరుగు సేవల ఉద్యోగుల సంఖ్యను విడిగా పొందుపరిచారు. ఆ ప్రకారం పోలీసు, విద్య, వైద్యఆరోగ్య శాఖలలో ఖాళీలు ఎక్కువగా ఉన్నాయి. పాఠశాల విద్యాశాఖలో 9,600 పోస్టులు ఖాళీగా ఉన్నట్లు ఆ శాఖ ఉన్నతాధికారులు నివేదికలో పేర్కొన్నారు. ఇందులో ప్రత్యేక గ్రేడ్‌ ఉపాధ్యాయులు (ఎస్‌జీటీ) 5,800, స్కూలు అసిస్టెంట్లు 2,500, భాషాపండితులు, వ్యాయామ ఉపాధ్యాయులు 300, మోడల్‌ పాఠశాలల ఉపాధ్యాయుల పోస్టులు 1000 ఉన్నాయి. ఇవిగాక ఉన్నతవిద్య, విశ్వవిద్యాలయాలు, సాంకేతిక విద్యాశాఖల పోస్టులు మరో మూడు వేల వరకు ఉన్నట్లు తేలింది. శాఖల వారిగా వచ్చిన వివరాలను ఆర్థిక శాఖ సేకరిస్తోంది. మొత్తం పోస్టుల్లో నాలుగో తరగతివి మినహాయించి, మిగిలినవి ఖాళీగా చూపనున్నారు. ఒకటి, రెండురోజుల్లో కచ్చితమైన సంఖ్యపై స్పష్టత వచ్చే వీలుంది.