క్రమంగా పెరుగుతున్న తెలంగాణలో పగటి ఉష్ణోగ్రతలు

 


తెలంగాణలో పగటి  ఉష్ణోగ్రతలు క్రమంగా పెరుగుతున్నాయి. గరిష్ఠ ఉష్ణోగ్రతలు 36.6 నుంచి 39 డిగ్రీల వరకు నమోదయ్యాయి. శుక్రవారం సూర్యాపేట జిల్లా పాలకీడు మండలం అలంగిపురం, ఖమ్మం జిల్లా ఎంకూరు మండలం తిమ్మరావుపేట, భద్రాద్రి కొత్తగూడెం జిల్లా జూలూరుపాడులో 39 డిగ్రీల చొప్పున గరిష్ఠ ఉష్ణో్గ్రతలు రికార్డయ్యాయి. జీహెచ్‌ఎంసీలోని మచ్చబొల్లారంలో 36.6 డిగ్రీలుగా నమోదైంది. కనిష్ఠ ఉష్ణోగ్రతలు క్రమంగా పెరుగుతున్నాయి. ఆదిలాబాద్‌ జిల్లా బజార్‌హత్నూర్‌, మెదక్‌ జిల్లా నర్సాపూర్‌ మండలం నాథనాయిపల్లిలో 14.2 డిగ్రీల చొప్పున కనిష్ఠ ఉష్ణోగ్రత రికార్డయింది. తూర్పు, ఈశాన్య దిశలనుంచి గాలులు వీస్తున్నాయని హైదరాబాద్‌ వాతావరణ కేంద్రం తెలిపింది. హైదరాబాద్‌లో ఉష్ణోగ్రతలు పెరిగి పగటి పూట ప్రజలు ఉక్కపోతకు గురవుతున్నారు. ఉష్ణోగ్రతలు క్రమంగా పెరుగుతాయని వాతావరణశాఖ అధికారులు తెలిపారు.