జాతీయ రాజకీయాలపై సీఎం కేసీఆర్ దృష్టి.వివిధ పార్టీల నేతలను కలిసే అవకాశం.


 సీఎం కేసీఆర్ మరోసారి నేడు ఢిల్లీ వెళ్లనున్నారు. బేగంపేట విమానాశ్రయం నుండి ప్రత్యేక విమానంలో బయలు దేరనున్న ఆయన.. మరోసారి జాతీయ రాజకీయాలపై దృష్టి సారించినట్లు తెలుస్తుంది.



నేడు ఢిల్లీ వెళ్లనున్న సీఎం తిరిగి ఎప్పుడు వస్తారనే సమాచారం లేదు. ఈ నెలాఖరు వరకు జాతీయ స్థాయిలో వివిధ రాష్ట్రాలు, వివిధ పార్టీల నేతలను కలిసి అవకాశం ఉన్నట్లుగా తెలుస్తుంది.

ధాన్యం కొనుగోలుపై కొంత కాలంగా కేంద్రంపై విమర్శలు గుప్పిస్తున్న సీఎం కేసీఆర్ అవకాశం వచ్చినపుడల్లా కేంద్రంలో అధికార పార్టీ బీజేపీకి వ్యతిరేకంగా వివిధ జాతీయస్థాయి నేతలను కలిసి చర్చలు జరుపుతున్నారు. ఈ క్రమంలోనే ఇప్పుడు ఢిల్లీకి వెళ్లనున్న కేసీఆర్ ఈనెల 22న చండీఘడ్ లో పర్యటించి రైతు ఉద్యమంలో మరణించిన 600 మంది బాధిత కుటుంబాలను పరామర్శించనున్నారు.


అనంతరం ఢిల్లీ, పంజాబ్ సీఎంలతో కలిసి రైతు ఉద్యమంలో మరణించిన వారి కుటుంబాలకు ఒక్కో కుటుంబానికి రూ.3 లక్షల ఆర్థిక సాయం అందించనున్నారు. ఆ తర్వాత ఈనెల 26న మాజీ ప్రధాని దేవెగౌడ కుమారుడు, కర్ణాటక మాజీ సీఎం కుమారస్వామిని కలవనున్న సీఎం.. ఈనెల 27న బెంగళూరు రానున్న అన్నా హజారేతో సమావేశం కానున్నట్లు తెలుస్తుంది. అప్పటి పరిస్థితిని బట్టి ఈ షెడ్యూల్ ఇంకా పొడిగించే అవకాశం కూడా ఉన్నట్లు టీఆర్ఎస్ రాజకీయ వర్గాల సమాచారం.